Sot, në Qendrën e Njësive të Specializuara në Vrellë, u zhvillua ceremonia zyrtare e dorëzim-pranimit të poligonit të gjuajtjes dhe poligonit me pengesa, të cilat janë rinovuar nga ushtarët profesionistë të KFOR-it, përfshirë edhe pjesëtarët e kontingjentit amerikan.

Në këtë ngjarje morën pjesë përfaqësues të lartë të Policisë së Kosovës dhe të misionit të KFOR-it. Të pranishëm ishin drejtori i Përgjithshëm i Policisë së Kosovës, kolonel Gazmend Hoxha, përfaqësuesi i Shtabit të Përgjithshëm të KFOR-it, kolonel Ferrara, komandanti i KFOR-it amerikan, kolonel Helzer, si dhe kolonel Mentor Shabani, drejtor i Departamentit të Njësive Speciale.

Në fjalimet e tyre, kolonel Hoxha dhe kolonel Helzer theksuan rëndësinë e bashkëpunimit dhe koordinimit të vazhdueshëm në fushat teknologjike dhe logjistike.

Ata vlerësuan kontributin e përbashkët në realizimin e këtij projekti, i cili do të ndihmojë në përgatitjen profesionale të njësive speciale dhe në përmbushjen e misionit për sigurinë publike dhe rendin kushtetues.

Në shenjë mirënjohjeje për bashkëpunimin institucional, kolonel Hoxha dhe kolonel Helzer shkëmbyen pllakatë nderi. Gjithashtu, u ndanë mirënjohje për ushtarët e kontingjenteve ndërkombëtare dhe për zyrtarët e Njësive Speciale të Policisë së Kosovës, për angazhimin dhe punën e tyre të palodhshme në renovimin e kapaciteteve stërvitore./Arbresh.info